為謙謙重燃希望 令愛心創造奇迹

早產男嬰林廷謙出生時體重不足一磅半，十五個月來從未離開病房，更因患有先天性心臟病誘發氣管及支氣管收窄，無法張開氣道自行呼吸，多次因為缺氧而徘徊於死亡邊緣，需長期依靠呼吸機協助呼吸。醫生話去台灣接受氣管植入支架手術以改善呼吸困難，成為謙謙唯一希望，無奈費用高昂，家人因為無法籌措超過一百五十萬港元醫療費而徬徨不已，太陽報愛心基金與東方日報慈善基金義不容辭，全力相助，為謙謙帶來希望。

呢嗱，《太陽報》及《東方日報》登高一呼，讀者齊齊響應，報道一出街，善長仁翁即紛紛來電表達關注，為謙謙送上祝福，鼓勵佢堅強活下去。讀者嘅愛心，感動咗謙謙父母，平日愁眉深鎖嘅林父表示好窩心，連聲多謝太陽報愛心基金與東方日報慈善基金，「如果唔係你哋盡力幫手，我哋都唔知點算好」。

其實，大愛不言謝，救急扶危一向係太陽報愛心基金與東方日報慈善基金嘅宗旨，咁多年來，兩個基金凝聚社會愛心，展現人性光輝，助人無數，創造咗一個又一個起死回生嘅奇迹。各位一定仲記得，幾年前罹患先天性單邊肺部發育不全綜合症嘅女童蔡文茵奮戰死神十個月，喺太陽報愛心基金與東方日報慈善基金全力協助下，一個月內籌得善款超過一百八十萬元，順利遠赴台灣接受植入氣管支架手術。現年三歲嘅茵茵唔止擺脫全天候佩戴呼吸機嘅煎熬，仲可以同其他小朋友一樣跑跑跳跳。

今次太陽報愛心基金與東方日報慈善基金再接再厲，向謙謙伸出援手，由於有茵茵嘅成功經驗，令謙謙媽咪對愛兒去台灣接受手術充滿信心：「茵茵得，謙謙亦一定得。」冇錯嘞，愛心可以戰勝一切，謙謙加油吖！

講開又講，香港醫療水平喺亞洲一向名列前茅，喺兩岸三地中更加係首屈一指，點解近年愈來愈多病人要舟車勞頓、山長水遠去台灣做手術呢？謙謙係咁，茵茵係咁，菲律賓人質事件傷者易小玲亦係咁，究竟係乜嘢原因呢？講到底，咪又係庸官禍港囉。人稱「每周一鑊」嘅前食衞局局長周一嶽執掌醫療系統八年，搞到亂足八年，公立醫院烏煙瘴氣，醫療事故無日無之，病人邊度仲有信心吖！

點都好喇，香港醫唔到，台灣有希望。太陽報愛心基金與東方日報慈善基金全力幫謙謙籌募醫療費用，有各位善長仁翁嘅支持，相信謙謙一定可以戰勝病魔重獲新生，我哋全力撐你o架！