SUN搞作：少膽虫手記：狗仔隊轉型
「勁呀！正呀！」淫賤黎呢兩日好似機癡上身咁，拎住部手機係咁篤係咁篤，時而發出讚嘆之聲，少膽虫我服務壹全霉咁耐，都未見過佢咁專心，真係令我好困惑。
「虫，快啲嚟，我哋斟下大計先！」淫賤黎次次講親「大計」都冇好嘢，呢次好難有例外。「所有狗仔隊有特別任務，放心，全部加人工！」吓？我冇聽錯嘛？唔通淫賤黎篤手機篤到短路？
「知你諗唔通嘞，你睇！」淫賤黎亮出手機，原來佢加入咗一個叫「鐵路裙底呵呵呵」嘅群組，專畀賤男分享偷拍片段。雖然淫賤黎好此道絕不出奇，但同特別任務、加人工又有乜嘢關係？「虫，呢條絕對係財路！你知唔知幾多港男鍾意偷拍？只要我哋喺動呻吟整個收費會員區，日日上載偷拍片，肯定發過豬頭！出面班狗仔隊，成日話自己偷拍幾叻幾叻，依家就叫佢哋長駐鐵路站，影裙底春就夠嘞！老幼唔拘，重重有賞！」
唉，雖然又係呢啲天方夜譚嘅建議，但係本虫一樣拍心口應承搞掂佢。點解？壹全霉弄虛作假出神入化，整幾條模擬偷拍片有幾難？只係班男同事要着裙扮女人犧牲色相，真係有啲過意唔去，又唔想睇落去。
