SUN奇古怪：SUN潮語：【九叔】
潮語「九叔」係諧音，「九」其實係指男性器官嘅粗口發音，「叔」其實係「縮」，即係收縮嘅意思。據一般男性嘅生理認知，當極度恐懼嘅時候，男性陽具係會「收縮」，所以有一句俗語係話「嚇到X都縮」。於是有人喺網上留言，就用到「九叔」呢個潮語，去說明遇到可怕嘅情況，既非粗口，又表達到嗰種驚嘅感覺，用到個「叔」字，又可以尊敬長輩，盡顯中國人嘅美德。
剛公布嘅施政報告，被指偏向基層市民而忽視中產，更有指出特首咁做係為咗取悅基層，更甚者有人話咁做係拉一派（基層）打一派（中產）嘅古老鬥爭手段。
至於施政報告提出嘅好多鴻圖大計，包括建屋計劃同甚麼人工島等嘅科幻構想，到底實唔實行到？過唔過到環評？過唔過到立法會？呢個都唔重要，最重要係有人信，有人覺得特首做到嘢，咁就已經達到效果，最後搞唔搞得成？咪同未來有冇真普選一樣，係一個謎。
不過最嚇人嘅都係之後阿蘇局長，佢話未來每年會有高達七千萬大陸旅客訪港，呢吓就真係唔講得笑！成七千萬人，即係香港人口十倍嘅強國人湧嚟香港，真係嚇到好多香港人「九叔」！
要去到「九叔」嘅地步，當然要有番咁上下可怕先得，例如係交通意外，或行行吓街有嘢喺眼前跌落嚟之類，又或者約咗心儀已久但又未見過嘅異性網友出嚟見面，對方真身原來係年初三咁嘅樣，都真係會嚇到「九叔」。
唔知道新上任嘅新聞專員馮偉光，係咪因為見唔慣大場面，喺施政報告記者會見到咁多人，嚇到「九叔」，以致計錯時間，錯漏百出，以佢嘅能力，除咗「九叔」之外，仲可以叫佢做「七叔」。「七」係乜嘢？自己諗啦！
