政壇：搞搞政：「幫港出聲」猛諗計揼心口反佔中
搞活動唔少得錢，佔領中環發起人要四出籌款，估唔到反對佔領中環行動嘅團體「幫港出聲」都一樣，佢哋頻頻喺報章賣廣告宣傳反佔中理念，開支少啲都做唔到，尋日佢哋就宣布新一輪揼心口行動，包括賀歲電影首映專場籌款、高爾夫球籌款賽及名人籌款飯局等，目標係籌得六百萬元。籌款好講究人脈同活動嘅創意與吸引力，咁樣先有吸金力，「幫港出聲」嘅負責人如科大經濟系系主任雷鼎鳴等今次睇怕要絞盡腦汁喇。
設計圖片及對白
睇佢哋宣布嘅一系列活動，本月二十八號就喺尖沙咀一間戲院舉行電影首映籌款專場，呢場首映主要嘅贊助人包括前立法會議員黃宜弘嘅太太梁鳳儀。「幫港出聲」召集人馮家彬話，預計首映可籌到八十萬元，除咗呢項外，仲有連串活動展開，籌得嘅款項會點用呢？據講，會用作聘請國際知名專家去研究佔中對香港嘅影響，亦會舉辦研討會等活動，總之，筆錢會用於反佔中，希望幫到香港喎。
