陳振彬（右二）與一眾青年創業家合照，左起：劉堃、劉銘佳及阮丹蕾（右一）。
青年事務委員會主席陳振彬（Bunny）近年每逢農曆年尾，都會喺柴灣青年廣場舉行「味酒得」歡聚派對，前晚嘅活動就吸引逾二百位政商界好友到場湊熱鬧。派對以青年餐飲創業家為主題，Bunny特別邀請幾位青年飲食業才俊到場顯身手，除咗主場嘅Palco意大利餐廳行政總廚劉銘佳及太極樓老闆阮丹蕾外，仲搵埋民政事務局前常秘李麗娟嘅公子劉堃（Chris）到場整車仔麵小食，個個食到舔舔脷！
蕭烱柱（右）拖埋太太黃樂怡（左）現身，作為政府前同事嘅李麗娟（中）當然要影番張相留念啦。
食物及衞生局局長高永文及副局長陳肇始、教育局局長吳克儉及副局長楊潤雄、商務及經濟發展局局長蘇錦樑、懲教署署長單日堅都有嚟，前高官除咗有「媽打」李麗娟外，仲有保安局前局長李少光同藝人兒子李霖恩一家，而外號「蕭公子」嘅前規劃地政局局長蕭烱柱夫婦亦有捧場。
年前創業開車仔麵檔嘅Chris拎咗百幾磅咖喱魚蛋、豬皮、蘿蔔、牛腩等公諸同好，結果兩個幾鐘就被賓客掃清光。其實一眾高官平時好少喺街邊拮魚蛋掃小食，派對有得供應，自然食得津津有味。好似高永文就最愛食豬大腸，而吳克儉就鍾意食豬紅同豬皮，至於媽打就最愛囝囝整嘅蘿蔔喇。
第一手消息請下載on.cc東網
