依家敢同毓民（中）過招嘅蔣麗芸（右）自爆曾經怕事。
接連爆出涉有外傭在港被虐待事件，立法會議員蔣麗芸（Ann）因此憶起人在外鄉嘅辛酸。阿Ann話，當年佢喺加拿大讀大學時，有次逼巴士途中遇到有個男人特登行埋佢度「索油」，佢原本都打算報警，但因為自己係二等公民，擔心去到警署冇人理、甚至被人蝦，所以就好似嗰位被虐待嘅印傭咁唔敢報警。佢話好明白印傭嘅感受，亦更加覺得要爭取港鐵有女性專用車廂喎。
雖然阿Ann講到自己讀書時好驚青，但佢尋日喺立法會政制事務委員會政改公聽會上就同議員黃毓民「駁火」。話說毓民寸與會嘅政制及內地事務局副局長劉江華係「哨牙仔」，阿Ann於是幫口反指毓民係「豆沙喉」，加上佢之前多次喺各大小會議同泛民主派議員激辯，真係好難想像阿Ann曾經係怕事少女囉。如果時空交錯，當年嘅巴士癡漢見到佢哋駁火呢一幕，相信都唔敢抽阿Ann水喇。
第一手消息請下載on.cc東網
