有環保團體去年七月搞咗個「減廢約章」行動，邀請一班立法會議員、區議員、政府機構簽名承諾減少浪費，唔少議員一開始都自命「環保大使」，結果七十個立法會議員當中，只有十一個人肯簽名。長春社理事鍾姍姍仲踢爆自由黨講一套做一套，口口聲聲話願意為環境作出承擔，但實際上一直都唔肯停送紀念品，造成唔少浪費，認真係大嘥鬼。
長春社過去一直接觸唔少議員、機構，希望佢哋帶頭實踐減廢，鼓勵社會支持環保，最終響應嘅立會議員寥寥無幾，五百零七個區議員入面，更只得四十一個人表態支持，人數少得可憐！民主黨一班立法會議員全部冇晒影。長春社早前去過立法會大樓檢查議員辦公室啲垃圾，鍾姍姍話，立法會九樓可謂「大嘥鬼」重災區，皆因垃圾桶裏面除咗有好多剩食，仲畀佢哋搵到一對全新無用過嘅女裝拖鞋！佢指摘有議員毫無環保意識，另外，有好多議員「鍾情」外賣奶茶，但往往未飲晒就成杯丟落垃圾桶，將液體同固體廢物撈埋一齊，搞到垃圾車傳出陣陣惡臭，佢語重心長奉勸一班議員，學習吓咩叫廢物處理啦！
政府方面，力推「惜食運動」嘅環境局並冇簽到約章，反而局長黃錦星就以個人名義支持。據聞因為好多政策由前朝定落，搞到依家局方要改善都要嘥好多時間處理。唉！講到尾，咪又係「貪曾」前特首曾蔭權爵士做落嘅衰嘢囉，連累今屆政府執手尾，認真累人累物。
第一手消息請下載on.cc東網
