政壇：政改公聽泛民冇影
立法會政制事務委員會舉行多場政改諮詢公聽會，尋日嗰場都有約一百六十個團體及人士報名參加，但出席嘅議員就寥寥可數，泛民主派議員更幾乎唔見影，搞到差啲流會。見到咁嘅情景，就連出席公聽會發表意見嘅人士都睇唔過眼，兩度有公眾人士要求議員劉慧卿等泛民議員點人數。結果，尋日場公聽會發言人士當中唔係要求點人數，就係疑似爆粗。
設計圖片及對白
與會者不滿爆諧音粗口
尋日朝早公聽會開會時，四十名委員會成員只有十位出席，泛民更只得白鴿黨嘅劉慧卿同人力嘅陳志全，結果要響鐘點人數。委員會主席譚耀宗擔心唔夠法定人數十四人要流會，仲提議如果唔夠人就以「非正式會議」方式繼續開會，費事嘥到場者嘅時間，好彩最後一分鐘四名議員趕到，先至唔使流會，最後衝閘嘅泛民有公文袋嘅郭榮鏗，佢哋嘅黨魁梁家傑更加遲到添。
雖然公聽會開得成，但之後出席嘅議員人數又跌番落個位數，引起嚟公聽會發表意見嘅人好不滿。本身係學民思潮成員、以「直接提名後援會」召集人身份出席嘅黎汶洛，以及「香港獨身男性要求廢除功能組別支持全民提名聯盟」嘅杜夫就要求卿姐幫佢哋點人數，但卿姐就冇理會。部分出席公聽會嘅後生仔又講粗口諧音，「制止路姆西再現協進會」主席陳國興仲話唔想再選出個冇認受性嘅「路姆西」、「西你路姆」咁話。結果就畀譚耀宗話佢意有所指而制止佢發言。
呢啲公聽會本嚟會聽各界意見，但滿口講瞓身爭取嘅泛民議員一係冇影，一係遲到，參加者又一副攪亂party咁嘅款，咁樣爭取民主真係笑死人囉！
