施政報告提肅貪 皆因煲呔佗衰家
施政報告一向係社會問題寒暑表，只要將施政綱領正話反讀，就知香港當前嘅問題所在。譬如話，當局大灑金錢扶貧，咪就係因為貧窮問題嚴重囉；又譬如話，當局大興土木建公屋，咪代表無殼蝸牛怨氣沖天囉。好嘞，家陣施政報告話要加強肅貪工作，即係反映乜嘢問題呢？答案一字咁淺，咪就係因為官場貪風猖獗囉！
特首梁振英尋日發表任內第二份施政報告，罕有咁提出要「加強肅貪工作」，話要協助各政策局、部門及公營機構檢討紀律守則，確保達到公眾期望嘅最高誠信標準，藉以提升廉潔管治喎。施政報告仲預告，廉政公署將有新動作，一方面加強內部監控工作，擴展內部審計小組，提高署內人員對風險及財務管理嘅意識，另一方面亦會加強對外宣傳，樹立形象，包括舉辦經典廉政電視劇集放映會等等。
畫公仔唔使畫出腸，施政報告強調肅貪，多得「絕代雙貪」前特首曾蔭權爵士同前廉政專員湯顯明好帶挈。貪曾被東方報業集團踢爆「貪遍省港澳，歎盡海陸空」連串貪腐醜聞之後，唔止扮哭無淚，仲扮過死狗，承認自己所作所為「同公眾期望存在落差」，港府第一人淪為「香港第一貪」，廉潔蕩然無存，港府想唔肅貪都唔得喇！
至於湯顯明咯喎，亦係一擔擔嘅咋。貪湯橫行廉署五年，豪飲酒，豪遊埠，豪送禮，搞到廉署烏煙瘴氣，清譽不保，港府再唔撥亂反正，唔通真係想打爛廉署招牌咩。
講到呢度，大家係咪好心痛呢？香港賴以成功嘅廉潔與法治，就係咁毀於絕代雙貪之手，港府再唔諗計補鑊，受害嘅點止廉署同港府，成個香港都畀佢哋佗衰吖。唔係危言聳聽o架，美國傳統基金會及《華爾街日報》日前發表「全球經濟自由度指數」，香港雖然連續二十年蟬聯全球最自由經濟體，但被排名第二嘅新加坡進一步追貼，僅以零點七分領先咋，主因就係香港嘅廉潔指數急跌囉。正如立法會議員話齋，絕代雙貪嘅貪腐醜聞臭名遠揚，搞到香港國際形象急跌，簡直係佗衰家！
慶父不死，魯難未已。家陣內地正全力反貪，老虎蒼蠅一齊打，香港又點可以例外吖。港府想肅貪，唔係冇辦法嘅，速速將貪曾及貪湯法辦，向全世界顯示打老虎決心，咁好過播乜鬼經典廉政電影喇，係咪！
