福布斯雜誌母公司放緊盤，吸引咗世界各地買家，聽聞人稱「上海和黃」嘅復星都有興趣。依家競購已進入第二輪，要同對手德國Axel Springer SE、新加坡控股公司Spice Global Pvt. Ltd「鍊過」。至於復星係用復星集團身份，定係用上市公司復星國際（00656）名義出手就不得而知，但唔理咁多，復星國際股價尋日創新高，升咗百分之六威吓先。

郭廣昌

原來復星○九年早就同福布斯夾份出雜誌中文版，管理層當時話：「我們非常敬仰福布斯家族及雜誌。」仲話希望將中國經濟出色一面帶畀世界，事隔五年，可能真係心想事成！

復星集團喺董事長郭廣昌帶領下頻頻入貨，繼收購紐約市One Chase Manhattan Plaza後，復星國際買埋葡萄牙國有銀行Caixa Geral de Depositos旗下保險公司嘅控股權，據聞出價十億歐元，福布斯今次叫價五億美金，對復星嚟講，濕碎shopping啫。

第一手消息請下載on.cc東網iPhone/iPad/Android/Windows Phone Apps