SUN搞作：打橫嚟講：北上發達的虛構故事
一早起身，即十一點左右啦！到屋企樓下茶餐廳食早餐（當然仲有早餐啦！賣到十二點半o架！）邊食住A餐鮮奶麥皮，邊睇牆頂角落嘅電視節目，見老套劇，似重播嘅，因布景殘舊、內容不新鮮！
劇中戲子無神無氣的，按劇本唸白：「阿仔，你醒啲做人啦！嗱！隔籬屋狗仔中學未畢業，都知道要儲錢北上創業！幾年之嘛！家吓人哋揸Ben史喇！你仲十吓十吓！只顧打機。」阿仔還拖：「唓！我哋成條村咁多名人你唔講，淨係講嗰件擦鞋狗？嗱！樓下阿朱仔同對面街嘅熊仔無北上發展咩？下場點呀？佢哋唔出力咩？但衰老實囉！狗仔狗仔……嗰條粉皮成日吹水當秘笈，又鍾意走精面、托大腳、呃呃騙騙，喺大陸咪如魚得水囉！好叻咩！正契弟……」
茶餐廳周老闆也忍唔住口：「哼！呢啲劇本邊個寫o架！講咗十幾年啦！北上發展？仆直就有份，發達有幾多人吖？喺上邊，無關係嘅畀人溶咗渣都無呀！」
周老闆身邊個伙記超哥：「咪係！新聞紙都有賣啦！啲廠佬成日要同啲村政府打交道、派紅包，否則無好日子過！無生意時，無人理無人幫，見你環境好呀，就日日嚟搲爛腳呀！」
另一個熟客財哥加把口搭訕：「係呀！我有個親戚字都唔識隻，成日靠喊打喊殺嘅！返上大陸幾年咋！依家連乜乜政協都做埋，仲住豪宅添噃！我哋都懷疑佢啲錢係唔乾淨嘅！」
周老闆：「唔係懷疑。一個人正正經經，三幾年會搵得幾多吖？」
伙記超哥：「咪係！一定做埋啲傷天害理嘅陰騭嘢！」
小市民七嘴八舌，到尾，只係唔信喺大陸老老實實會發達囉！完全係虛構嘅！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
