自壹全霉畀人力數六宗罪後，淫賤黎面都燶埋，少膽虫就淪為發洩嘅工具，左一抽右一鞭，「腦細，啲怒火出晒未，少膽虫頂唔順捱打喇……」就喺少膽虫求饒之際，肥豪又急急走咗入嚟腦細房，「壹全霉又畀人數，今次鬧我哋係外國鷹犬兼無報格！」

「早兩日係六宗罪，加埋呢次咪即係柒……」少膽虫未講完，又捱淫賤黎重擊，「豈有此理，《爛果》點會無報格，咁我哋平時賤賤格格算係咩？」聽到淫賤黎嘅「偉論」，少膽虫梗係大表贊同，「我哋一向淫得嚟夠賤！」誰不知肥豪搭訕，「咁我哋係咪即係賤格嘅狗？」

「就算我哋係狗，都係隻高人一等嘅狗！」少膽虫補鑊。

淫賤黎面色一沉，少膽虫即刻解釋，「腦細，俗語有云︰『住洋樓，養番狗。』幾時會有人話養唐狗？如果依家右邊有隻番狗，左邊有隻唐狗，腦細你揀邊隻？」淫賤黎不加思索，「梗係番狗！」少膽虫續道︰「咪就係囉，依家我哋有得做番狗，總比做唐狗好！」淫賤黎大悅，「講得妙，我哋係隻高人一等嘅番狗！」

其實無論係左邊嘅狗，定係右邊嘅狗，咪又係淨係識吠嘅狗……淫賤黎真係無得救！

第一手消息請下載on.cc東網iPhone/iPad/Android/Windows Phone Apps