過去好多研究同分析都難以評價中港兩地青年人嘅優劣，唔知經常游走中港兩地嘅香港青年聯會主席霍啟剛又點睇兩地青年人呢？

設計圖片及對白

啟剛尋日接受電台節目訪問時，講到中港兩地青年人嘅分別，佢都話其實好難比較，事關喺中港融合嘅前提下，大家都係一家人。不過，佢就好欣賞內地青年無論讀書定學英文都非常積極，加上佢哋父母好多都讀書唔多，所以知道屋企人嘅期望，變得好有責任感。佢又話內地嘅進步係循序漸進，一步一步嚟，唔係一步登天，而目前喺好多敏感嘅國際議題上，內地都有發聲。

籲提升副學士認受性

至於本港青年就喺創意方面比較強，但佢認為本港青年人應該放眼世界，關注更多國際、兩岸及內地時事，吸收多啲唔同嘅睇法，用唔同角度去分析事物。對於有人話睇得多新聞令部分學生對內地反感，佢話呢樣係個人判斷嘅自由。對於學民思潮嘅評價，佢覺得香港係個可以自由表達訴求嘅地方，但同時《基本法》係香港發展嘅根基，任何人發表意見嘅時候都必須守法，例如闖入軍營呢啲行為就唔應該發生喇！

對於剛發表嘅施政報告，啟剛話唔想打分，因為政府已經好努力推出措施去解決問題，例如房屋問題，認為部分青年人反政府並非因為買唔到樓，只係需要一個長遠嘅私人空間。佢又認為政府應諗吓點樣提升副學士喺商界嘅認受性，增加學位數目成本高，唔係長遠解決方法。佢又話最缺乏幫助嘅係嗰班人，並唔係最頂尖又唔係最清貧嘅一群，希望政府會撥番多啲資源畀佢哋喎！

第一手消息請下載on.cc東網iPhone/iPad/Android/Windows Phone Apps