特首梁振英尋日去立法會發表任內第二份施政報告，立法會秘書處於是順勢推出立法會YouTube頻道同Flickr相簿，將視像片段擺上網畀市民收睇，實行配合網上時代發展。雖然秘書處好細心咁為網民提供整個會議過程嘅廣東話、英語同普通話錄影片段，現場版本仲附設手語傳譯畫面。不過，一段片足足有成兩個鐘咁長，毫無刪剪，似乎唔係好符合網民事事要快又要準嘅心態囉！

立法會秘書處正式推出立法會YouTube頻道同Flickr相簿，一開手機就可以緊貼立法會資訊。（互聯網圖片）

此外，秘書處仲將議員參加本地及海外視察活動、與訪客會晤同埋開會時嘅照片放上Flickr相簿，等市民可以掌握議會最新動態。至於幾時會推出立法會專用嘅流動應用程式，秘書處就話應用程式喺iOS同Android平台嘅測試已經進入最後階段，預計好快就可以正式推出。到時市民只要一開手機應用程式，就可以知道立法會開會時間、議員通訊錄同議員參與官式活動照片等資料，隨時知道班議員做緊乜。

第一手消息請下載on.cc東網iPhone/iPad/Android/Windows Phone Apps