政壇：政改公聽騎呢組織湧現
話說立法會政制事務委員會喺上周六舉行嘅首次政改公聽會，席上出現唔少奇怪團體，例如「雲外看特區關注組」、「政改雞蛋關注會」、「耶教異聞錄節目質素關注組」等團體就派出代表出席會議。政制事務委員會後日將會舉行第二場公聽會，今次再有唔少特別團體報名出席公聽會，包括「香港泰拳理事會有限公司」、「中國香港旅行遠足協會」等，唔知又會唔會重複上周「協助飯團入閘大聯盟」代表「鹵味男」扮要除褲嘅騎呢情節呢？
不過，除咗「熱血公民教育後援會暨關注組」、「全民提名F5鍵更新部」、「政改假諮詢關注組」、「制止路姆西再現協進會」、「香港獨身男性要求廢除功能組別支持全民提名聯盟」等擺明屬於泛民主派嘅團體外，仲有港區全國人大代表王敏剛、新民黨葵青區區議員徐曉杰、準備參選海怡西嘅新民黨新人陳家珮、香港泉州市同鄉總會等建制派人士，睇嚟今次公聽會將會出現泛民大戰建制嘅激烈場面。
