政壇：漁農業翻生 高佬賢有運

貪曾等業界自生自滅

CY去年提出要設立嘅漁業持續發展基金早前先喺立法會財務委員會有驚無險咁獲通過五億元撥款，基金喺今年上半年終於可以接受申請。事隔唔夠一個星期，CY又喺尋日發表嘅施政報告中，宣布要檢討現行農業政策，以提升業界生產力同促進可持續發展，引進現代化、環保及保育大自然資源同農業生態嘅農業技術，仲話今年內就會諮詢添。

對於漁農界接連獲得重視，高佬賢話唔敢講自己腳頭好，只係前幾屆政府唔注重漁農業，貪曾在任時更禁止拖網捕魚，向業界開刀，仲要冇後續計劃畀番業界，令業界要自生自滅。依家新政府上場，加埋立法會嘅配合，雙劍合璧，先至令漁農界跑出，最好政府對漁農業「天天講、月月講、年年講」喎！

業界得到政府垂青，咁高佬賢又有乜大計呢？佢話依家喺農民、農村、農業、農地呢四農問題中，農地係最大問題，皆因唔少農地都變咗做倉庫，又或者等緊改變用途、被收購等，有農民租用農地兩個月續租一次，想發展高增值產業都唔得，對農業好大打擊。佢希望政府可以規劃整合農地，再分派畀農民，等佢哋發展農業都有啲保障。