狗咬狗骨爆醜聞 內地海關齊齊貪
水貨活動禁之不絕，搞到七國咁亂，市民怨聲載道，港府頻頻出招打擊，甚至不惜違背自由經濟原則而推出限奶令，因此被內地官方傳媒譏笑港人變得懶惰，有錢都唔賺。點知港府費盡九牛二虎之力，依然解決唔到水貨問題，究竟點解？
呢，咪又係貪腐作怪囉。深圳沙頭角海關最近爆出懷疑集體受賄醜聞，執法部門扣查三十幾架由香港過境深圳、主要走私電子產品嘅客貨車同私家車，十幾名關員及科長涉嫌受賄放水貨客過關而被捕，當中包括沙頭角海關高層添。
你知啦，香港係自由港，貨物一向自由出入，只要唔影響社會秩序及市民生活，水貨問題本來唔大，所以呢，打擊水貨活動主要靠深圳方面把關。家陣深圳海關懷疑集體受賄，一句自己人，水客自由行，唔怪得水貨亂象禁之不絕啦！
講到走私活動，大家早就見怪不怪。最經典莫過於轟動一時嘅遠華走私案，賴昌星打通廈門海關上上下下，五年內導致國家損失幾百億元稅收。至於中港邊境咯喎，海關受賄亦係公開嘅秘密。試諗吓，如果唔係貪官包庇，水貨客點敢招搖過市吖？又點會搞到邊境地區雞犬不寧吖？令人諗唔到嘅係，家陣內地全力反貪，老虎蒼蠅一齊打，可以講係風頭火勢，點知深圳海關依然前腐後繼，一啲都冇收斂到，簡直唔知個死字點寫！
冇法子嘞，家陣貪腐無處不在，唔止奸商污吏沆瀣一氣，據講連質檢同海關亦達成默契，先由質檢部門包庇奸商，製造黑心食品同商品，迫使老百姓到境外搶購商品，而海關就受賄放水貨過關，質檢部門同海關分頭搵食，各取其需，皆大歡喜。
最搞笑嘅係，沙頭角海關今次被揭集體受賄，原來係一場狗咬狗骨嘅官場鬧劇。深圳人民檢察院其實早就收到沙頭角海關受賄嘅消息，但一直闊佬懶理，直至最近一班檢察院員工到沙頭角中英街辦年貨，當中包括被禁止入境嘅生果，即使佢哋向關員表明身份，要求通融，亦遭海關一口拒絕。檢察院人員事後唔甘心，為求報復，對海關展開調查，結果揭發呢宗集體貪污案。內地官場淪落到狗咬狗骨嘅地步，同黑社會根本冇乜分別，真係既可笑，又可悲。
一句講晒，水貨亂象何時了，海關受賄知多少。內地幾乎無官不貪，旨意國產官僚把關，杜絕水貨亂象，簡直仲難過登天。求人不如求己，港府最緊要做好自己本分，否則，就算有限奶令都係嘥氣嘅咋，叮！
