城中鏡：張樹槐帶埋「家人」攀險峰
馬拉松發燒友、恒生銀行傳訊及可持續發展總監Walter張樹槐，新年期間遠赴阿根廷挑戰阿空加瓜山（Aconcagua）。Walter最高攀登至海拔六千三百米（約二萬一千呎），相當於十三幢環球貿易廣場（ICC）嘅總高度。據聞喺佢登山前數日，有兩名二十多歲嘅美國年輕人，喺相若高度因意外墮崖喪生。Walter仲話今次帶埋「家人」登山添！乜咁危險呀！咪搞錯，佢只係帶埋家人相片去啫！
張樹槐帶住家人照片（箭嘴示）登上阿空加瓜山。
Walter帶住照片、聖經金句攀登高峰，企喺山峰上，Walter體會何謂「大地在我腳下」，並以詩篇第一百二十一篇「我要向山舉目，我嘅幫助從何而來。我嘅幫助從造天地嘅耶和華而來。」嚟讚嘆造物者嘅神奇同埋偉大。
