城中鏡：八大證券會220團拜
眨吓眼，仲有唔夠半個月就到農曆新年，八大證券組織阿頭早前就開會，其中一個好重要嘅議題，就係選定今年聯合春茗嘅日期。八會鐵定今年二月二十日喺港交所交易大堂搞團拜，係人都知啲經紀最講意頭，「220」，諧音咁多「易」字，一聽就知好意頭。
陳立德
李細燕
暫時未知今年八會喺春茗中有乜新噱頭，但根據過往經驗，八會影嗰張「全家福」大合照肯定係佢哋最傷腦筋嘅事之一。事關每個經紀會都要派出幾名代表上台，八個會，都成幾十人；仲有嘉賓呢，包括港交所、財庫局、證監會同立法會議員，幾乎逼爆個台，因此主辦單位往往都要買保險，以策安全。
以前聯合春茗只有五個會參加，發展到今已有八個會加盟，包括證券學會，中資證券業協會、證券商協會、證券業協會、證券及期貨專業總會、證券及期貨從業員工會、網上經紀協會、專業財經分析及評論家協會。到時各會台柱包括李細燕、陳立德同閻峰等必定會捧場！
