城中鏡：火辣舞姿靚太送暖
仁愛堂日前舉行周年慈善餐舞會，為咗襯托「情迷西班牙」派對主題，主席陳鄭玉而、副主席Kimmy史顏景蓮同Louisa羅台秦等靚太齊着上火辣舞衣獻舞。
化身熱情女郎嘅史顏景蓮同丈夫史立德翩翩起舞。
羅台秦（右二）着上火辣舞衣獻舞，嚴重光（右三）同林添茂（左三）專程去打氣。左二為戴澤良。
陳鑑光同太太陳鄭玉而（左一及二）親自招呼陳肇始及高永文（右一及二）。
舞衣體現香港精神
其中Kimmy搵本地設計師趕製嘅舞衣靚絕全場，熱舞之間彷彿化身西班牙熱情女郎，加上多位舞林高手表演鬥牛舞及探戈，成晚氣氛勁高漲，話咁快就籌得近一百八十萬元善款。
Kimmy話件舞衣由設計到起貨只用咗一星期，再次發揮快靚正嘅香港精神。點解咁趕？原來佢初期冇諗過特登訂造晚裝，但由於佢係晚宴籌委會主委之一，諗諗吓，服飾都應該襯番晚宴主題，於是急急腳搵相熟嘅本地設計師一齊度設計，最終戰衣順利趕製。Kimmy再set個靚髮型，配襯埋頭飾，估唔到效果咁好，當晚好友盛讚不已。
Louisa同老公、中華廠商聯合會常董戴澤良當晚都買咗兩張枱，請埋中港台好友去打氣，包括Louisa嘅台灣鄉親、台北經濟文化辦事處處長嚴重光、港澳台灣慈善基金會創會主席林添茂。
齊惜福辦社區廚房
慈善機構齊惜福總幹事Robert楊民儉同太太亦喺度，Robert話齊惜福將喺油塘成立第二個社區廚房，希望每日可以為有需要人士提供二千個飯盒。
