上任唔夠一個月嘅新聞統籌專員（IC）馮煒光都算係惹火人物，未正式上任IC就已經喺就申請呢個職位回應傳媒時，爆出一句「我只能夠答三個字︰不予置評。」而熱爆全城。佢多年前喺報章撰文、講述積極約會心儀異性，但被請食檸檬嘅「失戀」故事亦畀人摷出嚟，而佢喺台北影嘅攬女照亦喺網上曝光。對於呢個咁具話題嘅人物，有傳政府中人都耍手擰頭，極力反對佢加入熱廚房。

設計圖片及對白

不過，喺香港大學畢業嘅馮煒光都有三個師弟照應，包括現任政府新聞處處長黃偉綸，同下月接任黃偉綸嘅政務司司長辦公室專員嘅聶德權，都係佢讀大學時嘅師弟，就連律政司司長袁國強都早喺大學時代已認識，而佢哋喺讀大學時已有交手。話說黃偉綸曾喺大學搞辯論隊，本身亦係辯論隊出身嘅馮煒光當年都有幫手。黃偉綸嘅辯論隊搞宿營集訓，馮煒光亦有份幫手訂場地，佢哋畢業後仲有一齊去旅行添！

聶德權讀大學嗰時係學生會屬會、俗稱「三蛇」嘅社會科學學會一員，同熱心學生會事務嘅馮煒光自然認識。至於袁國強，讀法律又冇乜點搞學運，應該同馮煒光冇乜關係。不過，原來袁國強當年要代表佢所屬嘅聖約翰宿生會去學生會評議會開會，所以，亦都同馮煒光有所接觸，都算係相識一場。

雖然馮煒光喺爭議聲中上任面對唔少壓力，但佢喺政府有呢三個舊同學，睇在一場相識分上，佢要吐吓苦水應該都唔會搵唔到對象，況且聶德權有三隻「耳」，又做過社會福利署，相信都會願意扶助「弱勢社群」嘅。

第一手消息請下載on.cc東網iPhone/iPad/Android Apps