政壇：怪醫忙造人唔記得提問？
特首CY梁振英今日發表施政報告後，聽日就會去立法會嘅答問大會。根據立法會《內務守則》第四條訂明，喺答問大會上發問最少嘅議員可以優先提出質詢。睇到今屆立會截至尋日嘅記錄，原來有一半議員已喺答問大會發問過兩次，當中大部分都係泛民主派議員，即係剩低未發問過嘅大部分都係啲建制派或溫和泛民議員，換句話，答問大會嘅安全系數好高。估唔到泛民喺施政報告呢個最重要時刻先至問唔到問題。
今屆任期內從未向特首提問嘅梁家騮，喺聽日答問大會會唔會破「蛋」呢？
根據立法會記錄，曾經提問過兩次嘅議員包括有平時言行最激嘅人民力量「大舊」陳偉業、「慢必」陳志全，同社民連嘅「長毛」梁國雄等，而餘下只發問過一次嘅就有十多名建制派同九名泛民議員，包括涂謹申、黃碧雲同陳家洛等。不過，當中我哋竟發現就嚟做第三任爸爸嘅醫學界「怪醫」梁家騮，竟然喺今屆任期內從未向特首提問過，莫非掛住造人忘記咗做議員？唔知佢聽日喺答問大會上會唔會破「蛋」呢？
