立法會議員今後冇得再用通往政府總部嘅秘道避見記者或市民。（資料圖片）
立法會早前辯論引用《立法會（權力及特權）條例》調查政府審批免費電視牌照期間，大批示威者喺立會大樓外集會，搞到班議員心慌慌要行連接政府總部嘅停車場「秘密通道」離開。由於有議員擔心有人會借秘道逃避民眾，主席曾鈺成尋日就宣布使用秘道嘅指引，仲明言議員如果只係唔想見記者或市民，係唔可以用保安理由要求立法會保安人員開閘咁話。
立會行政管理委員會經多次討論，終制訂使用秘道嘅指引。身兼行管會主席嘅曾鈺成話，日後如果立法會嘅出入口或外面馬路被堵塞，議員或官員係因公務身在立法會，又急住要離開嘅話，就可以提出使用秘道。另外，如總保安主任有特別保安理由，亦有權去決定係咪使用秘道，但使用後要向行管會提交書面報告。佢仲強調議員唔想見記者或市民並非保安理由，如有人不正當使用通道就自己負責喇！
另外由於秘道同政府總部相連，如政府總部被包圍，要求立會開閘又點呢？曾鈺成就話如果政府提出，立法會會按情況考慮喎。
第一手消息請下載on.cc東網
