政壇：激進泛民唔吼政改宴
政府展開政改諮詢，率領三人專責小組嘅政務司司長林鄭月娥今個月喺官邸舉行四場政改諮詢晚宴，宴請全體立法會議員。尋日舉行到尾場，三名激進泛民主派議員「大舊」陳偉業、「慢必」陳志全同「長毛」梁國雄就齊齊玩杯葛，話閉門進行晚宴係黑箱作業。長毛仲話要送《曼德拉自由之路》嘅電影戲飛畀林鄭，等佢明白民主係要透過抗爭去爭取咁話。換言之，林鄭叫開飯，佢哋就唔肯食喇！
設計圖片
轟閉門進行黑箱作業
其實，先前都有個別嘅泛民議員杯葛政改晚宴，好似新民主同盟嘅范國威就事先張揚話杯葛，但佢偏偏就入咗司長官邸打個白鴿轉之後返出嚟，再坐預先約好嘅的士離開，特登搞場大龍鳳出嚟做爛騷。
到咗尋日林鄭舉行嘅第四場晚宴，大舊、慢必同長毛本來都係座上客，但佢哋三個就唔畀面，講到明話唔會出席。大舊話晚宴閉門進行係黑箱作業，作為民主派就唔應該出席。至於長毛就準備咗兩張《曼德拉自由之路》嘅電影戲飛送畀林鄭，但佢唔去晚宴，點畀戲飛林鄭呢？佢就話會擺喺立法會，等林鄭自己嚟攞喎！
講開林鄭，話說佢早排喺電台節目，講過希望來年立法會唔會再有拉布。議事規則委員會尋日就開會，傾吓如果因為人數不足而導致流會，主席係咪可以有酌情權重開會議。不過，一諗就知，激進泛民主派就係靠不停點人數，最終導致流會而拉布，梗係唔會咁順攤支持啦，最後泛民建制傾唔掂數，惟有下次再傾過。
