醫局嫌貧愛富 公院玩殘病人

太一叮唔係隨口噏o架。呢，醫管局早前咪公布外科手術成績表嘅，新界西嘅屯門醫院連續五年表現遜色，屯院前外科顧問醫生黃就明尋日踢爆，屯院外科表現之所以一蹶不振，最主要嘅原因係醫管局管理無能，資源分配嚴重不公。今時今日，新界西聯網有成一百一十萬人口，但平均每一萬人只得六位醫生咁大把，對比港島西每一萬人有十一位醫生，富人聚居嘅九龍中更加多達十三位，比新界西多咗成倍幾。富區多醫生，窮區少醫生，你話醫管局唔係嫌貧愛富都冇人信啦，叮！

講到底，一切都係醫院聯網制度累事。當年醫管局設立七個分區聯網管理轄下醫院，時移勢易，分區聯網唔止變咗法國大餐多舊魚，更加導致公立醫院資源錯配亂象叢生。為咗爭奪資源，港島西東華醫院甚至不惜搵醫護人員扮病人篤數，唔知係咪因為咁，所以港島西聯網人手就比較充裕呢？

開講有話，濟弱扶傾，打救「醫療貧困地區」嘅辦法本來好簡單啫，無非增加資源同人手。好衰唔衰，當局規劃混亂，既無積極培訓醫科學生，又冇辦法挽留現職醫生，結果搞到公院前線流血不止，唔只屯門醫院人手不足，連新界東龍頭威爾斯親王醫院都面臨同一問題。外科手術成績表顯示，威院緊急手術表現包尾，急症病人術後死亡比率全港公院最高。威院死得人多，龍頭居然包尾，簡直荒天下之大謬。

威院失威唔係第一日o架啦。馬尼拉人質慘劇傷者易小玲曾在威院求診，三十幾次手術全部失敗，近日到台灣一次手術就成功，你話威院係咪醜死怪吖。有團體公布民調，近六成市民直指事件反映本港醫學界技不如人或者無盡力。其實，本港公立醫院唔係技不如人，要怪就怪前食衞局局長周一嶽鍾意做騷耍官威，信口開河話佢短期內唔使再做手術，結果醫院驚得罪高官，咪犧牲病人咯。因為一句官噏，易小玲同醫療形象齊齊被玩殘，難怪議員異口同聲批評，周一嶽無能兼無腦，累人又累物。

港府早前敲鑼打鼓成立醫管局檢討督導委員會，好心快快推行醫療改革，補番周一嶽留低嘅爛鑊，唔好繼續紙上談兵大隻講啦。再咁拖落去，唔知又會出現幾多亂象，玩殘幾多病人！