現今世界，資訊發達，每分每秒鋪出嚟嘅新聞消息，如江河崩堤，多到叫人追睇唔切；喺啲社交網站嘅「即時快訊」，不消三幾秒，就好快沉底，若無人share，分分鐘成為「過氣舊聞」，永不翻身，這是新世代的傳媒實相。

早前，在網上，有段片，係個中學生哥哥仔，以優勝者身份表演唐詩朗誦，仲係電視台攝製的，所以，觀眾好清楚的睇到「表演者」吟詩時搖頭擺腦、抑揚頓挫、七情上面的大特寫面部表情，因過分兀突滑稽，被網民瘋傳，引為笑談。

本以為這類悲情城市小甜品，過得一日半天，便再無人理、無人記得的了！因有其他更多低能白癡的趣怪嘢蓋過它吧！想不到，這段「讀詩篇」，不特只沒有平靜下來，點擊率節節上升外，還將討論層次提升到中國人的民族性道德觀去，實屬意料之外。

今鋪的醜態，不在乎那位學生哥，因佢係最不幸的受害者之一，佢都係聽從「老師」教誨，跟導師的指引，按「既定機制」演繹，受「造王者」擺布，代「幕後指揮人」完成他們理想的任務啫！嗱！我唔係暗插香港現時的政治處境呀！真係只想認真討論呢劑「朗誦節」嘅不幸事件咋！那學生哥搖風擺柳地唔知賴咗嘢的站在台前表演後，給予高分的「評判」在鏡頭前大讚該小朋友如何如何成功，怎樣點樣出色，佢知唔知咁做，係害緊一個年輕人？定係佢自己也十分低B呢？

當全城媽叉緊呢度嘅教育的時候，其實，成個社會充斥住一群冇腦反智嘅「造王者」。

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android Apps