SUN搞作：少膽虫手記：多膠魚
少膽虫返到公司，赫見枱面多咗缸魚，怒氣沖沖：「邊個咁斗膽放缸魚喺我枱面？」全場靜默，肥豪走到少膽虫耳邊細細聲話：「啲魚缸係腦細擺响度o架，你睇吓我張枱，都有一缸……」少膽虫嚇咗一跳，估唔到個兇手就係淫賤黎，「腦細擺响度做乜？」
肥豪望住啲魚：「腦細話擺啲魚喺度可以鎮壓住我哋班友仔，啲魚仲好有名堂添！」少膽虫放隻手落魚缸水中，正想把玩條魚，肥豪續講：「聽講叫─食人魚！」少膽虫即刻有咁快得咁快縮埋隻手：「吖，腦細咁重口味，養魚都要玩食人魚！」「我哋兩個咁得寵，都知腦細重口味啦……」肥豪笑笑口咁話。
少膽虫搖搖頭：「腦細得閒買魚玩鎮壓，不如搞好員工啲士氣啦！」肥豪摸吓條魚：「腦細仲話，畀呢條魚咬到嘅人，『你執到啦！』」此刻，倆人不禁異口同聲慨嘆：「多膠魚……」
