政壇：搞搞政：鬍鬚曾淪怪獸財爺

鬍鬚曾話唔少怪獸家長為咗唔想仔女「輸在起跑線上」，於是逼佢哋參加play group同興趣班，希望佢哋比同年嘅小朋友優勝。不過，佢初時就為呢班怪獸家長平反，話父母希望為仔女作最好預備係人之常情。之後仲將人生同馬拉松扯上關係，話馬拉松爭勝關鍵唔在於喺起跑線上爭先，而係可唔可以「由頭帶到尾」，喺合適時間先發力加速，爭取最佳名次。

唔驚競爭力跌 預算案卻靠嚇

當發表完一大堆似是而非嘅理論後，佢終於開始進入正題，話舊年瑞士洛桑國際管理學院（IMD）發表競爭力排名報告，香港由一二年嘅全球第一跌至第三。社會當時出現大量負面評論，擔心香港競爭力大不如前，佢認為呢班人正正就係怪獸家長，見到仔女考試名次由第一變第三就大發雷霆或憂心忡忡。

不過，諗深一層，鬍鬚曾每年喺發表預算案之前都靠嚇，話盈餘唔及往年，又話增加長遠福利政策會涉及龐大恒常開支，政府要小心考慮將來對公共財政嘅負擔，甚至講到用晒啲財政儲備就要加稅或者發債，無非都係想壓低市民對派糖嘅期望。

唔通鬍鬚曾嗰番馬拉松論，就係想掩飾自己年年計錯數，慢慢就會計得準？如果擔心競爭力嘅人就係怪獸家長，咁年年靠嚇嘅鬍鬚曾就係怪獸財爺，搞到香港變咗怪獸都市囉！