政壇：波波講外勞火上加油
打工仔最重要係養家同飯碗，政府遲遲唔肯撤銷強積金對沖機制惹來唔少打工仔不滿，一向都好惹火嘅發展局局長「波波」陳茂波尋日就繼續點火頭，重提畀人鬧爆嘅輸入外勞建議，話嚟緊幾年建造業整體人手都持續短缺，所以政府會充分利用補充勞工計劃輸入技術工人，唔知係咪嫌呢個廚房唔夠熱，要火上加油呢？定係波波想捱義氣為其他局長擋刀？
唔少行業面對人手短缺問題，政府一直心思思想輸入外勞，但勞福局局長張建宗次次講起都畀人狠批，波波尋日居然勇字當頭，喺網誌度講建造業長期人手唔夠，認為喺唔影響本地工人就業同收入嘅情況下，政府應該充分利用依家補充勞工計劃，適時輸入技術工人，但冇提及具體計劃。
佢仲話工地安全都好緊要，舊年政府引進咗同承建商安全表現掛鈎嘅支付計劃，工務工程意外率依家由九六年嘅每千工人計的五十六點六大降到前年嘅九點七，未來仲計劃修訂工務工程招標評分制，提高安全紀錄良好嘅承建商中標機會。
