政壇：港台被指冇口話自己
香港電台「大花筒」，花費六十億元起將軍澳新大樓，前排畀立法會工務小組委員會否決咗。公帑係咪運用得宜，社會都算係幾關注，點知港台有口話人冇口話自己，尋日《城市論壇》竟然講《明報》換總編輯一事，但管方同職方都冇人出席，即係得個講字，唔怪得之愛港力有人發言，質問主持謝志峰，點解唔講新大樓一事，謝志峰就解釋，話內部討論過，如果港台自己講番新大樓一事，會有利益衝突喎，咁就信不信由你喇！
有人話因鄧忍光（左）同蘇錦樑都放軟手腳唔拉票，令港台新大樓撥款遭否決。
本來港台新大樓被否決都算係大快人心，點知尋晚廣播處長鄧忍光出席港台數碼電視啟動禮時，主動話對港台嘅願望就係「建設新廣播大樓」，連商務及經濟發展局局長蘇錦樑都加把口，話呢個都係佢嘅願望。但係好多人都話因為佢兩個放軟手腳唔拉票，建制派先大條道理否決，今日咁講真係諷刺到極。另外，廣播處前處長黃華麒同調咗職嘅前副廣播處長傅小慧都畀面出席，佢哋就幫港台講好說話，相信港台可以克服困難咁話，之但係都要兩位在任者做嘢先得o架！
