民政事務局局長曾德成上周帶區議會代表團去北京同天津考察，尋日返港結束一連三日嘅考察行程。德成局長尋日喺網誌交代今次行程，網誌後段順手提及十八區社區重點項目計劃，但就絕口不提計劃進度緩慢，部分工程甚至連今屆任期完結前都未做得完，莫非德成局長唔記得咗計劃仲有好多手尾未搞掂，定係想避談呢個敏感議題呢？

設計圖片及對白

德成局長喺網誌中先係大讚區議會考察團收穫甚豐，仲透露民政局即將爭取為每屆區議會安排一至兩次外訪活動。之後，佢大談政府近來銳意加強地區行政嘅決心，話民政局去年年尾分別舉行咗四場專題論壇，並邀請到相關政策局及部門嘅首長同其他地區人士出席。佢更加賣花讚花香，話喺論壇上同區議員和增選委員深入交流，成功達致集思廣益嘅效果。佢又希望咁做可以加強政府同區議會之間嘅溝通，推動發展地區行政。

黨派之爭拗餐懵

至於社區重點項目計劃內容同進度，德成局長就話現階段各區議會已經就計劃達成初步共識，並已向民政事務總署呈交初步建議，而葵青區嘅項目仲已經喺上周提交立法會民政事務委員會討論。

老實講，十八個區議會淨係討論重點工程做乜嘢項目，因黨派之爭都拗咗好一段長時間，搞到超晒時都未交功課，依家各區交齊功課嘞，仲要等立會民政事務委員會討論，可以預料唔同黨派嘅議員，尤其係直選嘅議員為咗自己選民同地區利益又會拗餐懵，當然亦唔會輕易放過德成局長，好似蜜蜂採蜜咁係咁針住佢，試問佢點敢講幾時可以成事吖！

第一手消息請下載on.cc東網iPhone/iPad/Android Apps