政府部門霸靚地 與民爭利無公理

呢，灣仔入境事務大樓同稅務大樓等三幢政府建築，位處黃金地段，坐擁無敵海景，政府六年前決定將三幢大樓搬離灣仔，騰出地皮興建甲級寫字樓。點知講完就算，一直無聲無息，直到家陣至有少少進展，初步決定喺將軍澳興建新入境處總部大樓，預計六年後入伙。至於灣仔另外兩幢政府建築幾時至可以落實搬遷大計，仲係未知之數。

專業測量師計算，灣仔三幢政府大樓搬遷之後，騰出嘅地皮約有十四萬三千幾平方呎，地價估計高達三百一十五億元。即係話，到時庫房既可以增加一大筆收入，市場又可以增加甲級寫字樓供應，一舉兩得。

所以話，香港唔係冇地起樓，只係政府唔識善用土地，唔敢觸動官僚權貴利益啫。好似灣仔政府大樓咁吖，咁值錢嘅靚地，攞嚟做政府部門寫字樓，嘥唔嘥啲吖，當局早就應該騰出地皮，做到物盡其用喇。

講開又講，政府霸靚地例子數不勝數，又點只灣仔三幢政府大樓吖，尤其嗰啲專為高級公務員而設嘅豪華會所，直頭係篤眼篤鼻，除咗製造不公平，仲嚴重浪費土地資源。好似位於銅鑼灣遊艇會旁邊嘅警官俱樂部咁，地段得天獨厚，坐享全維港無遮掩煙花海景，佔地超過十萬平方呎，如果改為發展住宅等用途，地價估值起碼廿四億元。

話就話警官俱樂部，其實去消遣嘅多數係警司級以上「大Sir」，俱樂部早已淪為高級警官尊享嘅權貴會所，使用率長期偏低。仲有吖，俱樂部大模廝樣佔用海濱地段，直接影響公共空間，由於鄰近路面難以擴闊，令到海濱一帶無法建造連貫嘅單車徑，你話係咪離譜吖。

更離譜就係，由於受到港鐵沙中線工程影響，警官俱樂部本來明年要拆，竟然獲批三億元公帑原地重建，繼續享受特權，簡直豈有此理。其實，除咗警官俱樂部之外，仲有郵政體育會同掃桿埔紀律人員體育及康樂會，三個供公僕享樂嘅會所總面積超過三十萬平方呎，大過三個足球場，問你服未。

講到底，政府霸佔靚地，與民爭利，享受特權，去到邊都講唔通。現屆政府口口聲聲要適度有為，又話房屋問題係施政重中之重，既然係咁，就要盡快撥亂反正，還地於民喇，叮！