SUN搞作：少膽虫手記：道德淪喪
「腦細，大鑊喇，有人送花嚟呀！」少膽虫走到上氣唔接下氣。淫賤黎露出猥褻笑容，「你就大鑊，有人送花畀我，證明我仲有粉絲。咁又難怪嘅，我有啞生嗰種標奇立異嘅形象，再加埋我呢團一舊過嘅腹肌，實迷死唔少囡囡。」淫賤黎邊講，邊摸自己團豬腩肉。
少膽虫再開口︰「腦細，你誤會喇，係有人送悼念花牌嚟公司！」淫賤黎一聽，當堂嚇到擘大個口得個窿，「唔係啩，《喪報》回歸堆填區，花牌都要我自己買，無端端邊個會送過嚟？」只見淫賤黎左手拳頭緊握，少膽虫深明下一秒自己就會成為出氣袋，惟有隨口狗噏，「可能本身想送去《日月邪報》作悼念，不過唔小心送錯嚟壹全霉。」
兩者距離差天共地，少膽虫心諗今次實死冇生，誰不知淫賤黎拾吓拾吓又肯信，「係喇，我哋又唔似《日月邪報》，《爛果》一向走自由奔放路線，鍾意作乜就作乜，應該係送錯啫。」
《爛果》係作乜都得，弊在人哋送花牌嚟《爛果》係悼念新聞道德淪喪呢……
