SUN奇古怪：SUN潮語：【自 隊】

常言道狗係人類最好嘅朋友，酒又何嘗不是人類嘅好知己？無論地球上任何一個民族都有自己嘅釀酒技術，各種族嘅人飲各式各樣嘅酒。單係中國本身，各省各地各少數民族，都有具地方特色嘅酒。古代中國人吟詩作對，都係摸住酒杯底，飲到「大大哋」咁你一句我一句，寫出千古傳頌嘅唐詩宋詞絕句佳句，情形同依家去唱K飲酒差不多，三五知己放浪形骸。酒逢知己千杯少，話不投機半句多，飲酒都要睇時間睇心情睇人腳。喺錯嘅時間同錯嘅人對飲，成件事由享受變成貼錢買難受，嗰種感覺比飲大陸假酒更痛苦。良朋共敍，呢種感覺就真係有今生無來世。一個真正嘅酒徒，一定要懂得享受「自隊」，尤其係年紀漸大，見識多了，自會更加享受「自隊」，可以話係一種心靈洗滌。

好多人會覺得「自隊」係自閉嘅表現，係冇朋友嘅毒男專屬嘅行為。不排除有好多毒男宅女鍾意「自隊」，但係真正有品味嘅「自隊」，就係喺深夜萬籟俱寂，把杯自飲，慢慢地靜靜地思考一下人生，讓生命面對複雜嘅人情，糾結嘅煩憂好好沉澱一下，理順自己嘅情緒。至於醉不醉就隨緣隨心。當然加上好嘅音樂，播自己鍾意嘅歌，默默念故人，追憶生命中某幾段逝去嘅感情，亦都係「自隊」嘅另一樂趣。有時習慣喧鬧，難得清靜，「自隊」可以係一種真正嘅休息。雖然好多公園阿伯、退休人士都經常「自隊」，但嗰種日間嘅「自隊」係酗酒，比深宵「自隊」係有不同嘅。「自隊」另一好處就係可以乘着醉意，天馬行空，唔使同人傾偈干擾思維，畀思想無邊際飛翔，畀你諗到香港獨立都冇人阻止你。但「自隊」過後，返回現實。一覺醒來發現我城依然墮落如斯，才最需要「隊酒」。