政壇：搞搞政：降服大輝踢走田少新民黨婚事有陽謀
隨着十九位公民力量（公記）區議員以個人身份加入新民黨，新民黨同公記呢頭政壇婚事似乎轉入大直路，據講，兩黨內部雖有不同意見，但「米已成炊」，新民黨主席葉劉淑儀喜服在身已成事實。據講呢兩個建制派政團喺極有勢力嘅「媒人」逼婚下，焦點係下屆立法會選舉，而可靠消息更指，婚事主要係「降服」工業界立法會議員林大輝，同時將愈嚟愈唔似建制派嘅自由黨黨魁田北俊（田少）泡沫化。
設計圖片
大輝銳意喺下屆立法會選舉由功能界別轉戰地區直選，去年加盟公記並大力科水，目的係新東嘅樁腳，大輝嘅「唐營悍將」色彩太重，但佢廠商會背景亦形成一定牽制，令佢喺多項大是大非投票中都要「浪子回頭」歸邊撐政府，操盤人認為大輝仲「有救」，今次新民黨變相吞併公記，正係想進一步「箍」緊大輝，咁樣，佢可以兼得新民黨嘅中產票源同公記嘅地區樁腳，當選機會大增。
至於上屆勝出新東直選嘅田少，同CY政府牙齒印愈咬愈深，繼司局級官員集體杯葛自由黨黨慶，田少日前又串連泛民反對漁業持續發展基金撥款，疑似向CY公報私仇。據悉，田少嘅言行已令操盤人徹底失望，並下驅逐令，踢出布局勢難免。
