政壇：巨型本地薑迷倒高永文
旺角花墟前日起舉行一連三日嘅本地漁農美食嘉年華，一向着重飲食健康嘅食物及衞生局局長高永文尋日都豪花二千幾蚊掃貨，包括有機蜜瓜、食用菇、煲湯藥、一條本地飼養嘅石斑等，仲買咗有成呎長嘅巨型本地薑，點解買咁大舊薑？佢幽默而簡潔咁答︰「夠薑囉！」
高永文畀呢舊足足有成呎長嘅巨型本地薑深深吸引，隨即畀錢購買。
高永文尋日出席完嘉年華開幕禮後就去攤檔掃貨，見到大大舊本地薑時，佢先用雙手捧起嚟感受吓薑嘅重量，隨即掏荷包畀錢。講開本地漁農業，食衞局前日向立法會財委會申請五億元漁業基金撥款，就差啲畀自由黨聯同泛民否決。高永文覺唔覺得自由黨有意就司局級官員杯葛該黨黨慶而被報仇呢？佢自言唔會去猜測對方動機，亦唔會因為咁而一肚氣，最緊要局內團結渡過咗難關。
