立法會議員陳恒鑌（Ben）雖然係議會生力軍，但身體原來早已「五勞七傷」，膽固醇嚴重超標，尋日阿Ben出席一個活動時透露，政制及內地事務局副局長劉江華曾經指點過佢養生之道，包括飲一隻偏鹼性嘅礦泉水，但原來嗰隻礦泉水要成幾十蚊一支，實在買唔落手。另一招就係效法中國太極功夫嘅精神，即行步路、講句話都要刻意放慢啲，咁做不但可以養生，腦筋都可以轉得快啲喎。

聽聞今年各區區議會都有派代表參加嚟緊喺香港舉辦嘅馬拉松比賽，新界社團聯會多名成員如李世榮、黃碧嬌等都有報名參加。阿Ben會否報名？佢話以前都有跑過十公里比賽，但就輸咗畀太太，依家佢腰骨唔好，估計都無力完成。

第一手消息請下載on.cc東網iPhone/iPad/Android Apps