政壇：博愛撲水建最大安老院
沙田馬場尋日舉行博愛盃賽事，博愛主席曾耀祥、副主席陳李妮及李鋈發出席外，前總理兼縱橫遊業務顧問袁振寧及太太林藹欣更帶埋兩名囝囝入場玩，期間只見曾耀祥同博愛永遠顧問黃帆風雞啄唔斷，原來講緊獲恒基地產主席「四叔」李兆基捐地後，正籌備早日開展喺屯門藍地興建全港最大安老院嘅工程，佢哋呢個工程原來好重要。
據講，嚟緊星期三特首梁振英公布《施政報告》，便會宣布未來三至五年增加五千個新嘅長者宿位。曾耀祥話，未來幾年博愛會新增二千五百個長者宿位，雖然佔咗政府預計嘅一半，不過佔全港二萬五千個輪候長者數目只有一成，所以仍需各界一齊努力。黃帆風話，佢哋除咗向獎券基金申請撥款承擔安老院嘅建築費用，博愛都需要自行籌措龐大資金，即將接棒做主席嘅現任副主席何榮添就呼籲博愛大家庭齊心，做好呢件大事。
