政壇：譚志源搞Gag論政改
政改諮詢已進入第二個月，政制及內地事務局局長譚志源（Raymond）尋日又搞Gag，以煮飯推銷政改，直言「百人口味好難調」，好難煮到一味菜係符合所有人嘅口味，呼籲大家唔好為咗調味而拖，最緊要係「有飯開」、「食住先」免得捱肚餓喎。Raymond捧住飯碗招安嘅效果得唔得好難講，但諮詢以來，佢不時爆肚以淺顯比喻喺論壇及辯論上對抗激進派嘅狂轟，睇怕佢會食住條水繼續爆肚！
設計圖片
尋日立法會政制事務委員會就政改諮詢文件舉行公聽會，唔少激進面孔都有現身，Raymond都淡定應戰，面對提問人談及各種方案，佢話「百人口味好難調」，亦會令「煮飯」嘅人難做，佢話最重要係「有飯開」，即使最終方案不合乎自己口味，大家都可以「食住先」，否則大家捱「肚餓」，問題更大。諮詢戰打響之後，Raymond先後以選美論、玻璃器皿好易碎等形容政改，今次又整個煮飯論，擺明度定對白，口水戰時都唔會口啞啞。
林鄭落區被指做騷
另一方面，政務司司長兼政改小組主席林鄭月娥尋日就政改首次落區派傳單，揀咗沙田第一城呢個傳統中產區，佢先同第一城業主委員會成員飲個早茶，下午先至去屋苑內嘅商場門外見街坊，林鄭落區嗌咪足足半個鐘，見咗二十幾個街坊，都唔見有示威常客出現。不過，尋日嘅安排就被指做騷，事關林鄭全程一碌木咁企咗喺度，居民代表就安排街坊，排住隊、攞住咪，喺記者鏡頭面前向佢表達意見，有市民批評佢落區純屬係「promotion」（宣傳），如果冇心搞普選就唔好嘥時間、嘥錢搞咁多個人騷喇！
