周一嶽害人害物 醫管局添煩添亂

曾任易小玲主診醫生嘅前中大整形外科教授博昂志日前踢爆，易小玲喺威爾斯親王醫院嘅手術之所以唔成功，皆因周一嶽當年探病時隨口講過兩星期內唔使再做手術，威院為免令呢位所謂嘅「政治人物」尷尬，明知易小玲首次手術後傷口受感染，仍拒絕安排第二次手術補救，事件引起社會一片嘩然。

正如立法會議員黃毓民話齋，周一嶽簡直無腦，佢當年身為局長，唔係整形外科醫生，同病人亂咁講嘢，令威院管理層「錯摸上意」，亦令易小玲飽受三十三次手術失敗嘅折磨。黃毓民議員仲話，周一嶽做食衞局局長八年「搞到一鑊粥」，現屆政府委任佢做平機會主席，「隨時要孭佢啲蘇州屎」。

冇錯嘞，周一鑊信口開河隨口噏一句，病人被迫承受精神、肉體、時間、金錢等多重痛苦，庸官唔止靠害，簡直係攞命，佢賠唔賠得起吖？港府係咪要替佢孭鑊吖？當然喇，周一嶽係成件事嘅始作俑者，固然罪無可恕，而威院管理層為求擦鞋，將高官面子睇得比病人利益更加重要，同樣難辭其咎o架。

古人話，德不配位，必有災殃，真係一啲都冇講錯。周一鑊出晒名無料、無能兼無德，前朝政府混帳，畀佢掌管食衞局八年，結果亂足八年，毫無建樹不特止，公立醫院仲畀佢搞到烏煙瘴氣，醫療事故無日無之。本來，呢個成事不足、敗事有餘嘅庸官，早就應該好似瘟神咁被送走，估唔到現屆政府有眼無珠，竟然委以重任，畀佢翻閹做平機會主席，問你服未！

呢，早前北大人打左燈向右轉，呢頭拒絕向王維基發出免費電視牌照，嗰頭中移動又將擁有流動電視頻譜嘅子公司賣畀王維基，自相矛盾，令港府無所適從；估唔到港府自己亦係咁，口口聲聲要撥亂反正，仲話要適度有為添，結果居然與民為敵，重用廢官，簡直混帳過混帳。前朝曾蔭權爵士就話同周一鑊臭味相投，私相授受啫，現屆政府搵劣迹斑斑嘅周一鑊執掌平機會，你話係咪捉蟲吖？

話時話，家陣香港七國咁亂，加上周一鑊添煩添亂，港府民望想唔跌都幾難。計太一叮話齋，如果周一鑊仲知道廉恥，應該自己執包袱走人，如果繼續賴死唔走咯喎，七一遊行隨時多一批要求佢滾蛋嘅市民，叮！