「空降」呢個潮語，本嚟係軍事用語，指傘兵從飛機跳傘至一個特定地方進行戰鬥。二次世界大戰時期，喺好多場經典戰役，傘兵嘅「空降」行動，發揮咗決定性嘅作用。後來「空降」呢個字，就解作喺一個機構，突然有一個外來人擔當高層，或甚係一個CEO級，忽然從天而降，做咗你老闆。「空降」上司或阿頭呢樣嘢，喺商界屢見不鮮。呢啲突如其來嘅人通常不大熟悉公司文化，做嘢難免會同原有嘅同事唔夾，甚至炒大鑊。所以「空降」之後，通常都係大換血，一朝天子一朝臣，老臣被叮走，新血會加盟並臣服於新管理層。當年老董搞高官問責制，就係搵咗班問責高官「空降」政府各部，之後政府發生咩事？唔使講都知……
自從政府喺舊年換屆之後，社會事件真係接住發生。具爭議性嘅嘢，真係一單接住一單，好多事件好快就變得政治化，亦令人有好多猜想，將所有嘅事都聯想到同北京中央政府有關。最近本地某份自稱公信第一嘅報章，總編輯被撤換，懷疑將會由一個東南亞籍嘅非本地華人出任。消息一傳出，即刻由一單私人機構人事變動提升至新聞自由被干預嘅層次。其實香港嘅新聞自由度，由回歸之後一直下跌，跌至近年創新低，而香港多個傳媒機構嘅公信力，喺香港市民心目中都早已心中有數。不過，對於努力跑新聞嘅前線記者嚟講，今次事件，無疑係一種打擊。由非本地人出任總編輯，而該報嘅幕後老闆據稱同大陸有好多生意往來，好多人推斷，呢次事件唔止係「空降」高層咁簡單，加上該報有九成員工唔支持公司決定，睇嚟呢單嘢都幾惡搞！
香港今日政不通人不和，好多人話，不如中央「空降」一個有能力嘅市長嚟做好過。但係，睇番啲大陸官員醜聞不斷，搵邊個「空降」嚟做好？不如都係實際啲，爭取普選過好過。
第一手消息請下載on.cc東網廣告人、網台主持 阿東
