近排啲天氣愈嚟愈凍，尤其是壹全霉位處荒山野嶺，溫度就好似《爛果》銷量咁，不停再創新低。唔止少膽虫奀佻鬼命頂唔住，就連夠晒「脂深」嘅淫賤黎，着到成個愛斯基摩人咁都凍到縮吓縮吓，要吩咐少膽虫張羅一煲麻辣火鍋嚟暖胃驅寒。
少膽虫服侍淫賤黎咁耐，知道腦細鍾情重口味，煲嘢當然有咁辣整咁辣喇！「腦細，我已經落咗柯打加重辣度，啲辣椒要最辣嗰隻，實啱晒你口味！」淫賤黎一聽，即刻將手中《爛果》捲成棍狀，繼而兜頭扑落少膽虫度，「白癡！啲辣招已經搞到樓市回晒塘，我摸頂買嗰幾個單位仲未甩到手，仲加辣？」
無啦啦捱棍，少膽虫即時解釋︰「我唔係講嗰啲辣招呀！」話口未完，少膽虫又畀淫賤黎扑多嘢，「仲想狡辯！好在我老死仁仁啲黨友夠醒目，識得提修訂減辣，若然通過，政府想調整BSD就要先過立會嗰關，到時樓市炒風再現，我實發過豬頭！」
第一手消息請下載on.cc東網少膽虫
