設計圖片
自從特首CY梁振英上任後，富貴黨已幾近變成反對派，先係喺立法會向CY提出不信任動議，後來仲支持引用《立法會（權力及特權）條例》徹查免費電視發牌風波。咁啱之前好多官員又因有要事缺席該黨黨慶，唔知富貴黨黨魁田北俊係咪懷恨在心，尋日喺財委會討論漁業持續發展基金前夕，特登游說泛民各黨派唔好支持政府建議。眾所周知，成立漁業持續發展基金係CY嘅競選承諾之一，田少咁做擺明想剃CY眼眉，唔通田少想公報私仇？
據聞食物及衞生局中人得悉田少嘅計謀後，即時派出副局長陳肇始同政治助理陳凱欣去立法會游說泛民改變初衷，可惜泛民議員心意已決，公文袋黨魁袋巾傑仲講到基金擺明係補貼漁農界嘅政治酬庸，又承認田少喺投票前有游說佢哋投反對票。不過，據聞當局都成功爭取公文袋兩個議員改投贊成票，但兩人最終離席唔投票。
雖然泛民、富貴黨同工業界林大輝大力反對動議，但財委會最終仍然以二十九票贊成、二十三票反對，通過撥款申請，食衞局局長高永文會後不斷同建制派握手多謝佢哋坐定定投票，漁農界何俊賢對泛民反對感到意外，話議案喺小組委員會討論時無人反對，唔明大家點解去到財委會先至轉軚。其實唔使畫公仔畫出腸都知乜事啦！但田少否認係向CY報復，話投反對票係因為政府只派錢畀漁農界，如果政府下次成立紡織業同飲食業基金，佢哋一定會支持喎！真係乜都佢講晒。
第一手消息請下載on.cc東網
