政壇：陳智思止咳靠中醫

喺啱啱過咗嘅聖誕節假期，好多政界中人都飛往外地叉電，有啲專登去歐洲過白色聖誕，但行政會議成員陳智思就掉轉頭，一家大細飛去澳洲避寒。我哋早前喺中環撞到佢，見佢喺室內都戴住頸巾，原來佢去完旅行後就病病哋，仲有兩聲咳，最後要靠睇中醫先斷尾。

陳智思

陳智思話去旅行期間已感到唔係幾妥，喺澳洲嗰邊都有食西藥頂住，但依然冇乜好轉，晚晚瞓覺時都咳個唔停。本身係泰國華僑兼夾鬼仔性格嘅佢，從來有病都睇西醫，但唯獨係咳就要靠中醫醫治，所以佢由澳洲飛返港後，即刻拿拿聲去浸會醫院睇中醫，醫師幫佢執劑中藥，仲煲埋畀佢飲，即時好番好多。

佢話睇西醫最少要幾百蚊，但睇中醫幾十蚊就掂，而且真係有效，有覺好瞓。雖然病咗，但佢體重不跌反升，佢話澳洲甜品好正，今次假期狂食甜品肥咗三磅。其實都唔怕啦，佢咁鍾意做運動，每日跑多幾轉已經減番。