由城中年輕才俊組成嘅百仁基金尋日舉行就職禮，理文造紙主席Raymond李文俊冧莊做多屆主席，過百政商界名人都有捧場。記者尋日現場直擊成個活動過程，仲即時分段上載到東方報業集團旗艦網站「on.cc東網」，主人家Raymond睇到都忍唔住大讚「on.cc東網」效率快，會長施榮忻亦讚不絕口，話希望多啲後生仔睇到之後可以加入百仁基金大家庭喎！

李文俊大讚「on.cc東網」上載速度非常快。

李家傑（左）同施榮忻為培訓傑出年輕一代繼續出錢出力。

莊家彬（左起）、莊家蕙同莊家豐三兄弟姊妹一齊支持百仁基金。

除咗主席Raymond、創會會長李家傑外，特首CY梁振英同部分官員都有出席捧場，包括全國人大常委范徐麗泰、勞工及福利局局長張建宗、政制及內地事務局局長譚志源等。Raymond話百仁基金繼續以青少年發展為重點，希望嚟緊可以安排機會畀啲後生仔到基金會員嘅公司實習。

臨近農曆年尾，唔少名人都會出外旅遊，李家傑透露會喺農曆新年同爸爸恒基地產主席李兆基、細佬李家誠、家姐同細妹一齊去旅行。三代一齊出動，咁咪成二、三十人？但佢話唔止添呀！至於去邊度玩，佢就唔肯透露。

同場仲見到首次加入基金做副主席嘅羅詠詩同即將添丁嘅副主席楊華勇。楊華勇話太太喺屋企專心養胎。會唔會再追多個？佢話已經有一個屬龍嘅大女，今年馬年將會生個「馬」仔，湊埋一個「好」字之餘，剛好「龍馬精神」，夠晒好意頭，所以現階段冇諗，再部署吓先喎！

第一手消息請下載on.cc東網iPhone/iPad/Android/Windows Phone Apps