政壇：阿王狙擊王維基？
香港電視網絡主席王維基早前宣布啟動「Plan B」，決定今年七月一號開台，但因為發射站問題而遇到阻力，隨時變成無殼蝸牛。無獨有偶，立法會議員「阿王」王國興將會喺本月二十二號大會上提出動議辯論，促請政府加強規管流動發射站，莫非佢係想針對王維基？
設計圖片及對白
阿王提出嘅議案名為「規管流動電話發射基站，保障市民健康」，入面要求通訊事務管理局（通訊局）盡速檢討審批裝置手機基站嘅程序，規定喺審批有關嘅新申請或續期申請時，通訊局必須事先諮詢受影響居民嘅意見，並就此訂立實行時間表。佢又要求通訊局、屋宇署、衞生署記錄同統計手機基站影響居民嘅個案，並向受滋擾嘅居民提供解決方案。
環保署通訊局互卸
如果大家齋睇措詞，可能好容易聯想到王維基嘅發射站風波，加上阿王臨時改題目，難免令人進一步聯想事件或者同王維基有啲關係。不過阿王尋日就話呢個議案絕對同王維基無關，事關佢早喺去年已經收到唔少港島區居民投訴，話受到發射站射頻輻射影響，出現耳鳴、頭痛、失眠等徵狀，所以想透過佢向政府提出問題，要求政府改善。
阿王又話當佢開始跟進呢個問題，接觸有關部門要求解決事件後，先發現原來環保署同通訊局等政府部門互相推卸責任，話發射站產生輻射唔係佢哋嘅職權範圍內，搞到佢嬲到決定臨時抽走原先諗住討論嘅單肢傷殘議案，改為提出呢個議題，令有關當局冇得唔正視問題。
