不怕年年計錯數 只怕歲歲守財奴
斷估無辛苦，年年食詐胡，「史上最廢財爺」曾俊華又計錯數喇。香港會計師公會預測，由於賣地收入增加及政府開支減少，庫房本年度將錄得二百零六億元盈餘，同預算案預計嘅四十九億元赤字，簡直差天共地。其實，早前已經有會計師行預測庫房將會「轉虧為盈」，即係話，預算案錯就錯梗嘅喇，問題係估錯幾多啫。
即係咁，鬍鬚曾出晒名係「估錯王」，年年都話有財赤，結果年年都有大量盈餘，呢啲「狼來了」嘅把戲，大家都見怪不怪咯。嗱，就算市民唔追究鬍鬚曾計錯數嘅責任，但唔代表守財奴可以懶理民瘼一毛不拔。好簡單，依家庫房轉虧為盈，呢筆意外之財點用先？計錯數已經抵鬧，如果計錯數之後仲要做孤寒財主，唔肯還富於民，咁就係錯上加錯，絕對不能原諒。
會計師公會係咁建議嘅，新一份預算案應該推出措施回饋納稅人，好似提高子女免稅額、容許私人醫療保費扣稅、寬減差餉、津貼電費等等，呢啲例牌菜點都唔少得。冇錯嘞，基層市民固然要照顧，中產家庭亦唔能夠遺忘，鬍鬚曾千祈唔好扮失憶吖。正如有人話齋，首條貧窮線已經出台，如果無扶貧措施出爐，盞自取其辱嘅咋！
呢，舊年預算案貫徹守財奴作風，派糖愈派愈縮，結果引起全城聲討，鬍鬚曾仲搞出一幕「自認中產」鬧劇添，如果咁都不知悔改，唔通真係想日日畀人鬧係「大罪人」咩？咪話太一叮唔提醒，今年經濟未見好轉，通脹持續高企，衣食住行樣樣難，基層生活依然艱苦，若然預算案繼續不恤民情，不顧民瘼，你唔使扮中產嘞，索性做「終剷」喇，終日畀人剷吖！
話時話，港產官僚刻薄成性，口爽荷包立嘅又點止鬍鬚曾吖。施政報告下星期發表，港府吹風話喎，會動用二十億元推出低收入家庭津貼，紓解在職貧窮家庭嘅經濟負擔喎；又話資助中學開辦項目，協助青年就業輔導，同埋以津貼形式鼓勵企業提供學徒職位咁話。其實，呢啲措施都係小恩小惠，小修小補，相對於一百三十萬貧窮人口，簡直係杯水車薪，莫講治本，治標都未得喇，純粹得啖笑。
一句到尾，庫房水浸唔肯扶貧紓困，呢啲唔係審慎理財，而係不擅理財，縮骨掌櫃遲早畀人轟落台嘅咋。講真，家陣香港立立亂，港府還富於民，既可紓解民困，亦可消除民怨，咪當幫自己囉，無謂搞到「佔領中環」未爆發，添馬艦「門常開」先被人佔領吖，係咪！
