馮孝忠介紹金幣時搞爛gag，話係「one tonne」，唔係「雲吞」呀！
雖說金價走勢麻麻，但畀你見到大大塊嘅金幣都係會撲過去，更何況係一噸重嘅金幣！恒生銀行接連兩日會展出世上最巨型金幣，呢塊金幣嘅重量等於二百包五公斤大米，恒生執行董事馮孝忠話，銀行已經做足保安措施，唔驚畀人偷。
呢一個「2012年Australian Kangaroo One Tonne Gold Coin」為面額一百萬澳元嘅澳洲法定貨幣，由澳洲珀斯鑄幣局發行。今次專登到香港展出，只因恒生同珀斯鑄幣局合作多年，有番咁上下交情。
驟眼望落去見塊金幣暗淡無光，仲以為係假嘅添！但馮孝忠斬釘截鐵咁話，呢塊金幣由足一噸嘅百分之九十九點九九純金鑄造而成，而且截至一月八日止，金幣嘅金價已經超過三點零五億港元。馮孝忠喺介紹金幣時仲搞爛gag，話係「one tonne」，唔係「雲吞」呀！
依家金幣就放喺恒生總行二十四樓，究竟要用乜嘢方法將一噸重嘅金幣運上樓？恒生嘅同事就話係秘密。正因為保安問題，今次只係得恒生邀請嘅客戶先可一睹呢塊健力士世界紀錄最大同最重嘅金幣。獲邀請嘅你，快啲去睇喇，因為呢個金幣過兩日就飛去柏林參展啦！
第一手消息請下載on.cc東網
