城中鏡：徐悲鴻駿馬賀歲
眾所周知，國寶級美術大師徐悲鴻，因擅長畫馬而名聞遐邇。屯門市廣場因馬年將至，下星期開始展出徐悲鴻嘅經典遺作同幾幅過往從未曝光嘅作品，真係彌足珍貴。本身亦有珍藏大師作品嘅藝術品收藏家、明德校董會主席Linus張永霖尋日就喺預展中擔任導賞員，除咗向觀眾道出大師生平同作品特色外，仲話當今藝術品市場真假難辨，真係好考眼光o架！
張永霖（左）同太太極之欣賞徐悲鴻作品。
徐悲鴻畫作喺拍賣市場成交價屢創新高。（資料圖片）
Linus話，自從內地經濟起飛，藝術品市場就熱火朝天，就連來歷不明嘅畫作亦可高價賣出。而今次展覽嘅徐悲鴻遺作全部有來源有出處，倘若交付市場拍賣肯定價值不菲，例如場內一幅徐悲鴻嘅《奔馬圖》，Linus就估計起碼值港幣六千萬元。由於利之所至，市場上贗品充斥，一個不留神隨時中招，收藏家投資前就要做足功課喇。
雖然Linus自言投身藝術收藏多時都算係薄有經驗，但都曾經有購入假貨嘅慘痛經歷，所以佢每當發現心儀畫作，必定搵高手鑑定後先做收購決定。
