政壇：嫻姐搞特首擂台戰?
話說立法會超級議員陳婉嫻尋日同傳媒茶敍時，提到佢舊年為獨居長者搞嘅團年晚宴，話呢班長者好需要大家關懷，所以佢今年會繼續搞，並分別喺本月二十、二十一同二十三日舉行。
陳婉嫻搵咗疑似下屆特首候選人，出席本月下旬舉行嘅獨居長者團年晚宴。
咁邊個做晚宴嘉賓呢？嫻姐就話今次冇邀請勞工及福利局嘅官員，但就請咗特首CY梁振英同立法會主席曾鈺成。
除咗CY之外，曾鈺成都好似被傳過會選下屆特首，莫非嫻姐眼光真係咁獨到，想喺政改諮詢未完就搞個特首參選人比併會？嫻姐解釋，只係較多長者希望見到佢哋啫，特別係曾鈺成，啲長者話唔知喺乜嘢渠道見到佢，所以特別叮囑嫻姐邀請佢出席。
嫻姐又話今次個活動獲一位善長贊助五十萬元，同埋敍福樓集團執董黃傑龍以優惠價提供膳食先至搞得成，雖然話係優惠價咋，但有魚又有雞喎！
